Դեսպան Վ. Աֆյանի այցը «Marwah Studios»

21 մարտի, 2024

2024թ. մարտի 21-ին Հնդկաստանում ՀՀ դեսպան Վահագն Աֆյանն այցելել է Նյու Դելիին հարակից Ուտար Պրադեշ նահանգի Նոիդա քաղաքի կինոավանում գտնվող «Marwah Studios» ֆիլմարտադրող ընկերություն, որտեղ հանդիպում է կայացել Հնդկաստանի Մեդիա և զվարճանքի արդյունաբերության միջազգային պալատի (ICMEI) և Ֆիլմերի, հեռուստատեսության ասիական ակադեմիայի (AAFT) նախագահ, միաժամանակ «Marwah Studios» ընկերության հիմնադիր Սանդիփ Մարվահի հետ:

Ի շարունակություն օրեր առաջ Հայաստանի դեսպանությունում կայացած հանդիպմանն ու հնարավոր համագործակցության վերաբերյալ փոխանակված մտքերին, այս անգամ առավել առարկայական քննարկումներ են կայացել Հնդկաստանում հայկական ֆիլմերի ցուցադրության կազմակերպման շուրջ: Հանդիպմանն առաջարկվել է ոլորտային հետագա համագործակցության ծավալում, որում ներառված կլինեն հայկական կողմի համապատասխան մասնագետների վերապատրաստման ծրագրերի և համատեղ փառատոնների իրականացումներն ու կինոգործիչների միմյանց նշանավոր միջոցառումներին մասնակցությունը։ Երկուստեք կարևորվել է բարեկամության հազարամյակների պատմություն ունեցող երկու ժողովուրդների փոխադարձ ճանաչողության ընդլայնմանն ուղղված մշակութային նախաձեռնությունների կյանքի կոչումը։

Դեսպան Վ. Աֆյանն այցի ընթացքում ծանոթացել է կինոստուդիայի հնարավորություններին, ինչպես նաև մասնակցել վերոնշյալ ակադեմիայի սաների կողմից կազմակերպված Հնդկաստանի ամենանշանավոր տոներից մեկին՝ Հոլիին նվիրված միջոցառմանը։

Տեղեկանք

1991թ. հիմնադրված «Marwah Studios» ֆիլմարտադրող ընկերությունն ունի Հնդկաստանում բավականաչափ մեծ լսարան և իր հնարավորություններով զիջում է միայն Մումբայ քաղաքում գտնվող Բոլիվուդին։ Հիմնադրման օրվանից կինոստուդիան թողարկել է ավելի քան 4500 հեռուստատեսային հաղորդում շուրջ 50 հնդկական հեռուստաալիքների համար, մոտ 120 գեղարվեստական և 5000 ուսուցողական ու վավերագրական ֆիլմ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր